Beleef je de toal, cultuur én t landschop van de Veenkelonies!
Menu
“As dat mien ol-schoolkammeroad Haarm van de Zuudwenden nait is, mag ik n bone wezen!”
Paiter uut Gaiterveen keek nog even sekuur tou. “Joa hur, t is hom, vervast!”
En zunder zok te bedinken ruip Paiter, net as vrouger: “Haarm, hest de brij al waarm?”
t Was nog vroug, dij zoaterdagmörgn op de Promenade in Veendam, der was nog nait veul volk bie t pad.
Doardeur kwam t dat t antwoord van Haarm wied en zied te heuren was: nee Paiter, dij mout nog wat haiter!”
En dou pas keek Haarm om zok tou en zag e zien olle vrund Paiter stoan.
Nà,” ruip e, “dat is ook singelier dat wie mekoar hier tegenkomen noa aal dij joaren. “
“En aaltied nog dezulfde taim!” zee Paiter.
“Joa,” mainde Haarm, “zo pruiten wie vrouger op school aaltied al tegen mekoar, aaltied mit dij lutje scheldverskes.
Zowat heur je tegenswoordeg aal minder.
Ik kin die der nog mor zó n stok of wat opnuimen.”
“Ik ook wel,” zee Paiter, “zel wie ais perbaaiern houveul wie der nog kinnen? Begun doe mor, Haarm.
Nà,” zee Haarm, “de mooiste von ik aaltied dij veur Slakke-Jan, waist nog wel, dij was nait al te rad overal mit.
t Ging bie hom aalmoal op zien elvendattegsten, mor as wie hom mit dit versie pluigen, den timmerde hai der vot op.
Jan Pankouk, Jan Povverd
Jan eerdappeldaif
hai zit onder toavel
en slikt uut slaif.”
“k Heb voak n pak laaiter van hom had,” zee Paiter.
“Kinst dizze nog wel?
Appie, Kappie körsie brood
wordt van melkentwijbak groot.”
“Nee man, dij is hail aans,” zee Haarm.
“Appie Pappie mit t lappie veur t gat
Appie mos pizzen en t lappie wör nat.”
En Paiter zee:
“Haarm Pakkedaarm het knikkers te koop,
tiene veur n dubbeltje, is dat nait goudkoop?”
“Loat ik den mor aine op dien Geessie opzeggen,” laagde Haarm, “as wie nou toch persoonlek worden:
Geze Geze goezegat dij achter op de seze zat
Dag! zee de seze, weg was Geze.”
“De wichter haren dou nog van dij lange vlechten”, zee Paiter.
“Destieds zat Annechien de Lange veur mie in klazze en den hongen heur baaide vlechten op mien baanke. Ik huf allain mor even t dekseltje van mien inkpot openschoeven! Den zat zai hailemoal onder de inkt, dij Annechien.
Annechien, pannechien pikkelpoes
slöpt vanoavend in mien hoes
k zel t berrechie moaken
doar kin Annechien pannechien
pikkelpoes op sloapen.
“Mor doe hest dou n best pak klappen had van lange Roulf, doar haar zai n beetje verkeren mit.
Wel is groot op oarde?
Dat is lange Roulf dij mit kraanten rondlopt deur het haile loug.
Roulf het zeuven kinder mit n knorreg wief
dat kin hom niks schelen, hai het tiedverdrief. “
“Van de wichter kin ik nog n stok of wat,” zee Paiter.
Graitje Graitje Grobbegat
het vannacht n vrijer had
het ter bie op bèrre legen
het hom n dikke smok geven.
Jaantje,
Karrewarrewaantje
Karrewarrewinkel, tinkel taandje
“Hup” zee Jaantje.
Elizebet
dij t aal opvret
dij niks opspoart
dij gieregoard.
“Waist wat, zee Haarm,” wie sturen ze ais op noar dokter Jan Boer van De Koerier, lichtkans zet dij ze in kraande.”
“Joa,” mainde Paiter, “dat komt mie goud veur, den dou ik ter nog aine bie.
Derk ging noar kerk
mit pet op t ain oor
hai keek noar de wichter
mor nait noar pestoor.
En zodounde kin ie dizze scheldverskes vandoage hier lezen.
En as ie nog meer waiten den mag ie mie dij wel tousturen, den schrief ik der loater nog wel ais weer over.
t Adres is Ommelanderwieke 98, 9644 TN Veendam.
Aine kin ik der zulf nog wel bie doun:
Kloas speult de boas
mit stok in t swienhok.
Beleef je de toal, cultuur én t landschop van de Veenkelonies!